1 Raja-raja 14
Attu iato masakimi tu Abia, anakna Yerobeam.
Nakuami tu Yerobeam lako bainena: Melo ke umbaliliko kalemu ammu ke’de’, da natandaiko tau, kumua bainenako Yerobeam, ammu male lako Silo; dio nanii torro tu nabi Ahia, tu mangka umpokadanna’ kumua la diangka’na’ datu umparentai te bangsa iate.
Baako roti sangpulo sia deppa bua anggoro’ marangke sia tani’ enoan sangtonde, ammu male lako. Iamo la umpokadangko tu apa la dadi lako pia iate.
Napogau’mi bainena Yerobeam susito; ke’de’mi male lako Silo anna tama banuanna Ahia. Iatu Ahia tang pakitamo, belanna maraunmo tu matanna napobua’ kamatuanna.
Apa Nakua tu PUANG lako Ahia: Manassa la sae tu bainena Yerobeam ungkutanaiko tu diona anakna, belanna masaki tu pia iato. Susite susito la mupokada lako kalena, ke tamai dio mai susito sae umbalili kalena.
Iatonna rangi Ahia tu kumani’ki’na pentengkana, tonna mentengka tama ba’ba, nakuami: Tamakomi mai, e bainena Yerobeam. Ma’apai ammi susito sae umbalili kalemi? Akumo disua umparampoangkomi te kada malada.
Malekomi mpokadanni Yerobeam kumua: Inde sia tu kadanNa PUANG, Kapenombanna to Israel, kumua: Kuangka’moko dio lu te to buda sia Kupadadimoko datunna te taungKu to Israel;
sia Kualai tu kadatuan dio mai bati’na Daud, angKu sorongangko. Apa tang susiko taungKu Daud ungkaritutui pepasanKu sia ponno penaanna umpengkaolaiNa’ la umpogau’ manna malolona dio pentiroKu.
Apa umpogau’moko kadake losong anna mintu’ to dolo na iko sia malemoko unggaraga senga’na dipa’deatainna sia rapang-rapang dipodeata dipati’no’ la umpa’dikki penaangKu sia musualeNa’ lako boko’mu.
Iamoto manassa la Kuparampoi kamandasan tu bati’na Yerobeam. Sia iatu mai muane, bati’na Yerobeam, la Kumangsanni sola nasang, la to mala’bi’na la to bitti’na dio lu to Israel. Kusapui tu mai bati’na Yerobeam, susito ussapui tai, naurungan tae’mo tinampe len.
Minda-minda tu bati’na Yerobeam mate lan lu kota, la nakande asu, na minda-minda mate dio lu padang la nakande manuk-manuk dao lu langi’. Belanna Napokadamo PUANG.
Ke’de’mokomi ammi sule lako banuammi. Iake mentengkakomi tama kota, mate dukami tu pia iato.
Na mintu’ to Israel la umbatingi sia lao ullamunni; belanna iatu mintu’ bati’na Yerobeam ia manna te tu la rokko lamunan. Belanna dio lu mintu’ bati’na Yerobeam ia manna tu diapparan melona lako PUANG, Kapenombanna to Israel.
Apa la Napadenan PUANG Kalena tu misa’ datu la umparenta to Israel, tu la umpisanni bati’na Yerobeam. La susimo totemo te, na apa siapara la dadi to?
La Napata’pai lima PUANG tu to Israel, naurunganni susito marrang narogan uai, sia Naalai tu to Israel lan mai padang maelo, tu mangka Nakamasean nene’ to dolona, sia la Napasisarak-sarak sae lian sambalinna lu salu Efrat, belanna nagaragai tu mintu’ lentong kayu napodeata, tu umpa’dikki penaanNa PUANG.
Sia la Nasa’biangan tu to Israel natumang kasalanna Yerobeam sia kasalan tu napa’pesuan lako to Israel umpogau’i.
Ke’de’mi tu bainena Yerobeam male, anna rampo lako Tirza. Iatonna mane ullesei tu ampang banua, matemi tu pia.
Nalamunmi tau tu pia iato sia nabatingi mintu’ to Israel, susi kadanNa PUANG tu mangka Napokada nalopian nabi Ahia, taunNa.
Iatu tang dipokadannapa tu mintu’ tuna’na Yerobeam, umba nakua parari sia umba nakua ma’parenta, manassa iatu iannato tisura’mo lan sura’ ossoranna datu to Israel.
Iatu Yerobeam duangpulo ndua taunna ma’parenta. Mangkato malemi tama batu dilobang sola nene’ to dolona na Nadab, anakna muane, ussondai dadi datu.
Iatu Rehabeam, anakna Salomo, ma’parenta dio Yehuda. Patangpulomo mmisa taunna Rehabeam, tonna dadi datu, anna sangpulo pitu taunna ma’parenta dio Yerusalem, iamotu kota Napilei langsa’ PUANG dio lu mintu’ suku Israel, la Nanii umpatulangdan sanganNa. Iatu indo’na disanga Naama, to Amon.
Iatu to Yehuda umpogau’ apa kadake dio pentiroNa PUANG, sia umpa’dikki penaanNa Puang, anNa mangimburu losong pole’ na lako nene’ to dolona, napobua’ kasalan napogau’ tau iato mai.
Napabendan duka tau iato mai tu inan madao sia batu dipodeata sia lentong kayu dipodeata dao lu mintu’ tanete madao sia diong lu mintu’ garonto’ kayu makampu.
Sia den duka lan lu tondok tu to ma’gau’ sala dio to’ dipa’deatainna. Sia napogau’ tau iato mai tu apa megallianna mintu’ bangsa tu mangka Naula’i PUANG dio mai tingayona to Israel.
Iatonna taun ma’pellimanna kadatuanna Rehabeam, saemi tu Sisak, datu Mesir, ullaoi Yerusalem.
Narampami tu mintu’ pareanan lan banuanNa PUANG sia mintu’ pareanan lan tongkonan layukna datu, napoli’ nasang. Naala duka tu mintu’ balulang bulaan tu nagaragai Salomo.
Nagaragami Rehabeam tu ba’tu pira-pira balulang tambaga la sondana, anna patageranni kamandang to ma’kampa, tu ungkampai babangan tongkonan layukna datu.
Iake maleoi tu datu lako banuanna PUANG, naalaomi to ma’kampa tu balulang iato, undinna to napasuleomi tama bilikna to ma’kampa.
Iatu tang dipokadannapa tu mintu’ tuna’na Rehabeam sia mintu’ tu apa napogau’, tang tisura’moraka lan sura’ ossoranna mintu’ datu to Yehuda?
Tontong bang tu kasirarianna Rehabeam na Yerobeam.
Mangkato malemi tama batu dilobang tu Rehabeam sola nene’ to dolona, anna dipeliang lan kotana Daud, lan liangna nene’ to dolona. Iatu indo’na, disanga Naama, to Amon. Anna Abiam, anakna muane, ussondai dadi datu.